Мухаммад Солихнинг оиласи

Оврўпанинг олис ўлкасида кўксини шимолнинг совуқ шамолларига кериб, оёқларини Она ерга маҳкам тираб, тагига қанча кўп сув қуйсалар шунча ўсаётган мағрур чинор... Елкасига 20-асрнинг зилдай юкини ортиб, узоқларга кўз ташлаган йўлчи... Синдирган қалами ила зулмнинг башарасига Эркнинг сувратини чизган рассом... Бутун айби Ватанни ҳур кўрмоқ истагидан иборат жабрдийда миллат фарзанди...
Ёнида ҳар оқшом унинг билан бирга кўҳна Туркистоннинг чироғини ёқиб ўтирган оиласи...

Сен кетганда

Кетганда, бир аёлдай кетсанг эди,
нозу фироқ этсанг эди,
йўқ, бунақа кетмайдурсан сен,
нозу фироқ этмайдирсан сен.
Сен кетсанг, боғлардай кетасан,
вақт ўтган сари юк солиб.
Сен кетсанг, тоғлардай кетасан,
узоқлашган сари юксалиб.
Фиғонсиз, фарёдсиз ва тилсиз
чексиз бир Ватандай кетасан!

1986

Сиздан фарқли ўлароқ

Сиздан фарқли ўлароқ ҳар хил
йўлларини биламан овунишнинг мен.
Сиздан фарқли ўлароқ мени
вояга етказар етишмовчилик.
Узоқда милтиллаётган шамчироқ - нафрат
кўпроқ ёритaди йўлимни
меҳр қуёшига кўра дўстларнинг.
Агар ҳеч ким мени ерга урмаса,
кўкка қандай сакрай олардим?
Оддий ўсимликман, хуллас:
қанча кўп сув қуйсалар тагимга
мен шунчалик гуллаб яшнайман.

1983

Саёҳатга борадиган одам...

Узоққа саёҳатга ҳозирланган одамнинг биринчи навбатда ўз уйи бўлиши керак. Уйида катта чамадони, унинг ичида ҳар хил зарур нарсалардан ташқари пул тўла 20 та қопчиқ (ҳамён) бўлиши керак.

Саёҳатдан қайтганда совға сўрамайдиган ақлли болалари, қучоқ очиб кутиб оладиган чидамли хотини бўлмоги керак. Ниҳоят, узоқ саёҳатга чоғланган одамнинг сочларига оқ тушмаган бўлиши лозим.

Бутун буларни ўйлаб, мен уз фикримдан воз кечдим.

1982
("Валфажр",1983, Тошкент, Ғафур Ғулом нашриёти)

Бу шеьр ёзилганда муаллифнинг сочига, 1982 йилда, ҳали оқ тушмаган эди. Демак, шеьр каҳрамони ҳам Муҳаммад Солиҳ эмас.

Қолаверса, оилавий ҳаётида унинг каби омадли инсонлар кам десалар муболаға бўлмайди.

Бутун машаққатларга қарамай, бу оилада ҳеч кимсанинг Оллоҳ таоло унга ёзган тақдиридан нолиганини ҳеч ким эшитгани йўқ.